قصه علي ومنار ،، الجزء الثالث

**Mr.Koeney** · رقم المشاركة : ( 1 )

مراااحب علاااوي كيفك
عساك طيب ان شاء الله
وكيف المستمعين الاحباء

يلا نكمل قصتي

انا مع منار العصر علي البحر نشرب عصير وقاعدين نسولف.
وهو يدق جوالي علي ، الجوال السعودي .
واناظر ولا هو رقم احمد ، قلت ماني راد عليه ، اكلمه بعد العشا.
وهو يدق وانا اطنش واطنش واطنش وان الرجال ماهو تاركني ، ماهو راضي يحل عني ، احمد ماهي من عوايده انه نشبه انا استغربت اتصاله .
حتي منار قالت ياخي رد عليه ، قلت لا
قالت بالله عليك انك ترد عليه ،يمكن شي مهم.
الاتصال جاني حوالي الساعه 5.30 العصر بالضبط كان يوم الثلاثاء علي ماعتقد ، مستحيل اني انسي الاتصال هذا
المهم رديت بعد جهد جهيد:
انا : مرحبا
احمد:السلام عليكم كيف الحال علي عساك طيب ان شاء الله
انا :الحمد لله بخير وانت عساك بخير
احمد: الحمد لله بخير وش اخبار الجو عندكم عساك مرتاح وشكلك طاب لك المقعد هناك ماعد تشتاق لاخويااك
انا : والله الحمد لله ماعليه الجو زين ، و الله مانسيناكم يااحمد ، بس تعرف الواحد مايصدق انه يطلع من الرياض وجوها المروح .
ايه ونسولف شوي شوي وهو يتغير صوت احمد، لصوت اعوذ بالله منه، صوت واحد طايحه عليه مصيبه، مصيبه تهد جبال، والله هذيك المره اول مره بحياتي اخاف من احمد، اخاف انه صاير لاهلي شي ولا لاهله شي .
انا : احمد وش فيك عسي ماشر وش فيه صوتك ليش كذا احمد، وسكت احمد مارد علي ، واعيد واقوله احمد ياخي ترك طيحت قلبي بين رجولي قلي والله ماعد فيني حيل ، وبعد ساكت مارد، احمد احمد اصوت له بصوت عالي ، اقسم بالله انه مابقي في عروقي دم ، وشوي وهو يتنحنح ويقح شوي كانه يبي يتكم شي بصدره، قلت احمد وشفيك ياخي .
احمد:علي انت معك احد انا اسمع احد عندك يسولف ، قلت ايه وش عندك ياخي قلي والله ماعد في عروقي دم.
لاخلاص انا اقولك بعدين يلا تبي شي ،
انا : وين ياخوي انت مجنون تبيني انتظر لين تكلمني مره ثانيه انت مجنون، والله مايبقي في عروقي دم وش فيه اهلي فيهم شي .
احمد: لا الحمد لله كلهم بخير.
انا : اهلك فيهم شي.
احمد:لا ياخوي كلهم بخير الحمد لله.
انا : اجل وش فيه ليش انت كذا عسي ماشر.
احمد : ياخي سالفه تكدر الخاطر شوي مابي اكدرخاطرك انت مستانس لاتشيل هم ، انا اتصل عليك اليوم بالليل.
انا : احمد صدق مافيه شي .
احمد: لا الحمد لله مافيه شي، يلا تبي شي.
انا :لاسلامتك
احمد: يلا سلام
وقبل لايسكر وهو يشهق شهقه انا عرفها الشهقه هذي اعوذ بالله منها ومن صوتها .
انا دريت انه فيه شي ماهو سهل مصيبه صايره بس اهم شي انه اهلي واهله بخير ، مشينا علي طول للبيت ، حتي منار اسألتني اهلك فيهم شي احمد وش قالك وهي تلح علي، قلت شوفي يابنت الحلال مافيه شي بس هو الظاهر انه مريض شوي لاتشيلي هم.
مشينا قبل المغرب وصلنا لبيوتنا .
وانا بالي مشغول مره وش السالفه وش المصيبه اللي صايره بالرياض ، وتفكيري يروح ويجي مافيه يعني شي ،عجيب!!!!!.
وحاط الجوال قدامي ابيه يدق ماهو داق.
وانتظر وانتظر لين صارت الساعه8 بالليل ، وهو يدق الجوال واناظر الا رقم احمد، قلت يارب اجعله خير .
وارد عليه وهذا الحوار اللي دار بينا.
انا : يالا بدون سلام قلي وش صاير والله مابقي في عروقي دم.
احمد: علي علي قالها بصوت يخليك تخاف من داخل قلبك وهو يسكت شوي وانا اقوله احمد تكلم ياخي وشفيك، وهو يشهق شوي ، الشهقه هذي اعرفها شهقت البكاء .
انا : احمد انت تبكي والله اني داري اانه صاير مصيبه عندكم وش صاير.
احمد : علي فلان وفلان وفلان وفلان وفلان توفوا كلهم امس بحادث!!!!!!!!!!!!!!!!!!!!!!!!!!!!!!!!!!!!!!!!!!!!! !!!!
احترقت فيهم سياره مازن علي طريق الملك فهد ، مازن هو السواق وركبين معه كلهم الاربعه بسيارته الميني كوبر.
يوم قال الكلام هذا وهو ينزل علي دماغي مثل الصاعقه و دماغي يفور مره ثانيه.
كلهم ياربي ، لاحول ولا قوه الا بالله .
خلاص انا جايكم واسكر.
والله واصوت لخالي قلت انا ابي امشي ، قالي وش فيه عسي ماشر ، قلت له القصه انا ابي اروح اشوف اخويانا وش صار عليه واشوف اهلهم .
قال خلاص انتبه لنفسك والله انه يعز عليينا مشيتك بس الشكوي لله.
قلت يلاه واشيل اغراضي احطهن بالسياره. واشغل السياره بالليل حوالي الساعه 10 مستعد للمشيه.
وهي تشوفني قاعد اضبط بالسياره وهي تنزل بسرعه، قالت قلي يلا وش قالك احمد يلا غير تقولي الحين.
قلت شوفي يابنت الحلال انا مابي اكدرك علي شان موضوع مايهمك كثير.
قالت كيف اي شي يهمك يهمني يلا قلي.
قلت انتي مصره
قالت ايه قلي يالا
قلت خمسه من اخوينا توفا امس بحادث سياره.
والله وهي تسكت ، وشوي وتشدها بكيه .
قلت يامنار لاتعبين قلبي بعد انتي ، لاتخليني اشيل همك وانا راجع ، اللي فيني يكفيني.
قالت لي ومتي بترجع ، قلت والله مادري متي بس خليه علي التساهيل ان شاء الله بجي بس مادري متي.
قاالت وكيف راح اقدر اعرف اخبارك ، قلت هذا رقم جوالي خليه عندك ، وكلمني عليه.
والله وهي تخزنه بجوالها وهي تمشي ووجها كله دموووع ، قبل لاتمشي قالت لي اول مره اخاف من الفارق ياعلي .
ياعلي لاتغيب عني كثير والله يصير فنيني شي.
قلت توكلي علي الله ومايصير الا كل خير يالا اشوفك علي خير انتبهي لنفسك .
اسلم عليها وتروح لبيتهم وانا دخلت علي خالي اسلم عليه وطلعت ، وخالي طلع معي عند الباب، وهو يشوفها وهي تناظر لي من فوق وهي تنزل بسرعه وتعطيني علبه صغيره قدام خالي ، خلاص الموضوع صار واضح بيني وبينها.وانا قاعد ازين الاغراض وهي واااااقفه علي بابهم وانا امشي وهي تناظر لي .
المهم والله وامشي وامشي وامشي من طلعت من البيت واعطي السياره مانزلت عن 180 كم بالكويت واطلع من الكويت للرياض 200 كم الي 260 كم والله السياره جلد مافيه تفاهم ، والله من طلعت من الكويت السياره ما نزلت عن 200 كم ، وانا مشيت حوالي الساعه 11 بالليل الساعه ثلاث الا ثلث وانا بالرياض، طبعا ماخالفتين واحده من جوده والثانيه من دوريه امن الطرق.
انا مسكر جوالي ويوم وصلت فتحت الجوال والقي لها 6 مكالمات .
وصلت الرياض وحظرت العزا اانا وابوي واحمد وقمنا بالواجب ، والله انه شهر مر علي مادري من وين مستورد الشهر هذا اوله يازينه وتاليه اعوذ بالله منه.
هي كل يوم تلكمني وانا ماكلمتها لين مر علي الحادث اكثر من شهر ، يعني مصيبه اخوووياي اثرت فيني والله ماهي سهله خمسه من اخوياك كلهم يموتون مره واحده والله لون قلبك حجر الا يتأثر
واول اتصال اتصلته انا كان الساعه حوالي 11 بالليل اتصلت مابغيت اطول قلت يمكن انه تكون نايمه ، اخاف اني ازعجها .
والله وهي ترد كانها تنتظر اتصالي .
قالت علي مو مقعوله انت اللي متصل وشلونك وشلون دنياك ، مع اني مكلمها قبل يومين .
وكيف قلبك قدر انه يحن علينا بااتصالك هذا.
قلت والله يامنار انتي بالقلب وتعرفين انه انا توني طلع من صدمه ماني قادر اوصف حالي اللي مضي بس الحمد لله علي كل حال . الله يرحمهم ويغفر لهم ويعفوا عنهم .... اميييييييييييييين يارب
اللهم امين ياررررررررررب
انا لله وانا اليه راجعون لاحول ولا قوه الا بالله.
قالت وانت الحين وشلونك وكيف وضعك الحين ، قلت الحمد لله بخير عايشيين.
قالت علي لاتكلمني بالطريقه هذي تري والله اني ابكي ، ماقدر اتحمل انك تكون بالشكل هذا.
عاد انا بعدين عرفت انها حساسه مره اي شي يبكيها ، ماهي قويه مره . فيها ضعف غريب اول مره يمر علي .موضعف بس حساسه بدرجه رهيبه .
الحريم اللي مثلها قليل مره تعدهم على اصابعك.
والله اتوقع اني ولو انفخ عليها بكت علي طول .

بعد اسبوعين من اول مكالمه من قبلي اتصلت علي وقالت لي علي تري حنا جايين للسعوديه نبي نعتمر كلنا
قلت متي
قالت اليومين الجايه هذولي.
والله وبعد يومين وتتصل علي تقولي حنا وصلنا الرياض الحين وبقول لاهلي اني مريضه وبقعدهم يومين علي شان اشوفك
قلت لها لا مالها داعي قالت لا ابي اشوفك .
وش اسوي وين اروح علمني يلا .
قلت شوفي السكن طريق الاميرعبدالله فيه فندق واحد علي الامير عبدالله تمام ، واللقاء بمستشفي الحمادي زين قالت زين
وفعلا اتصلت علي قالت الحين انا ريحه لمستشفي الحمادي ، قلت انا الحين رايح له يلا اشوفك هناك.
واطلع بالسياره للحمادي وكيف اقدر اقابلها هناك ومعها اهلها قلت يارجل تتدبر اهم شي انك تشوفها وبعدين انقل هم ابوها وامها.
وصلت هناك وعلي اساس انها تدخل على الطيب وهي طالعه من هناك وصيتها انها تروح لقسم الاشاعه انا عارف واحد بغرفه الاشاعه وواصف لها غرفه الاشاعه.
وهي تجي هناك
والله يخليه واحد من اخوواي هناك فني اشاعه ضبط لي غرفه الرنين المغناطيسي وسكر الباب حق قسم الاشاعه كله قال معك نص ساعه لاتطول اكثر من كذا
وهي تجي تمشي لقسم الاشاعه وهو يحتريها عند الباب ، وتناظر له .
انا واصف لها شكله
قالت له انت فلان
قال ايه انتي منار
قالت ايه
قال ادخلي علي داخل.
وهي تدخل واسلم عليها مابي اخش بتفاصيل اكثر لانه انحرج شوي .
ونقعد ونسولف ، وهي تبكي قالت والله اني ماتصورت اني اشوفك ومع اهلي قلت الحين تقولي انتي معك اهلك خلاص خليه مره ثانيه ، ماتوقعت انك راح تسوي المستحيل علي شان تشوفني ولا بعد بغرفه الرنين المغناطيسي والله انه خويك هذا يستاهل حبه راس علي كل اللي سواه لنا.
قلت يابنت الحلال اهم شي شوفتك ، تري شوفتك بالدينا ، وهي تبكي مره ثانيه.
قلت وش فيك منار انتي بس تبكين ليش كذا
قالت والله ياعلي ماعندي غير دموعي ، قلت لاتبكين تري كذا تضيقين صدري عليك مايصير كذا
وامسك واحب راسها.
وهي تناظر لي وتهدى شوي ويدق علينا خويي الباب واطلع، قال شف هذا عصير لك ولها وبعد ربع ساعه لازم تطلعون والله اني ماقدر اوقف الممرضين يبون يدخلون للجهاز، يلا ربع ساعه وجيكم اطلعكم زين .
قلت زين
واجيب لها ونشرب العصير وهي تناشق خشمها ووشوي يلا تطلع الكلام .
واخذ اخبارها وتاخذ اخباري.
وبعد شوي يدق خوي الباب
قلت مابقي شي لازم نمشي يلا اشوفك علي خير انتبهي لنفسك يلا ، والله وخوي جايب معك كيس ادويه واشاعه مادري من وين جابها قال عطها لها ،علي شان تصرف نفسها عند اهلها، وانا شفت الادويه والقاها بنادول فيفدول كلها ادويه خفيفه مره.
والله الولد ذيب مره طبعا هذا هو احمد؟!؟!؟! .
اذا قلت الصديق وقت الضيق فهو احمد ، موقوف قسم الرنين المغناطيسي كله نص ساعه علي شاني والله يوم طلعنا وان فيه يمكن اكثر من 20 مراجع للجهاز ، والله وهو يصفهم بالدور انا اناظره وهو يضحك ويقولي شفت وش سويت فيني يلا اطلع.

**Mr.Koeney** · 09:01 AM

المهم رجعت انا للبيت وهي رجعت واتصلت علي وقالت انه بيمشون بعد العشاء للمكه.
بعد ثلاث ايام كلمتني تقولي انه هم راجعين للرياض وانه مارين مرور ماراح يقعدون.
رجعوا للكويت .

استمريت معها علي الحال هذا .
اناعدلت جدولي بالجامعه يوم الاربعاء علي شان يكون عندي ثلاث محاضرات بس الصبح وراجع للبيت بدري شوي انام وبعد العصر امشي للكويت كل اسبوع ، اقعد هناك للخميس . بالليل ارجع للسعوديه كل اسبوع علي الحال هذا حتي سيارتي طلعت من الضمان 100.000 كيلو متر بحوالي 8 شهور بس
كنت اتعذر لاهلي انه انا و اخوواي ماخذين استراحه بشمال الرياض ماخذينها كل اسبوع بس يومين الاربعاء والخميس لمده سنه وعلي شان كذا انا اروح هناك واقعد يومين وارجع.
استمريت معها حوالي ست شهور تقريبا وانا علي الحال هذا .
كان جدولنا كيف يوم اجي
اجي هناك الساعه 8.00 بالليل استريح واتصل عليها من الفندق طبعا مانتقابل الا ثاني يوم اللي هو الخميس.
يوم الخميس هذا نقضيه كله معه بعض من الساعه 10.00 الصبح الين 10.00 بالليل وكانت تتعذر لاهلها انه كل يوم خميس يقضونه ببيت واحده من صديقاتها وكانت واحده من صديقاتها عارف موضوعنا وكنت تغطي عليها .وكان معي رقم صديقتها اذا ماقدرت اكلم منار اتصل علي صديقتها تطمني عليها .

اذكر اني فتحت صندوق بريد خاص لي علي شان ترسل لي رسايل واي شي تبي ترسله لانه صندوق البيت ابوي واخواني يفتحونه.
عاد هي اصرت انه افتح لها صندوق علي شان ترسل لي .
والله انه عليها اسلوب وكلام مادري من وين تجيبه حتي كان كل اسبوع القي لها رساله رسالتين.
تقولي انا كل ليله اجي ابي اانام امسك الدفتر وابدا اكتب لك يعني بعد يومين ثلاث ايام تطلع معي رساله لك .
وكان في كل اغلب الرسائل اللي ترسلها فيها اشياء ياصور يابطاقات اي شي وانا كنت يوم الاثنين والخميس امر الصندق كل اسبوع اشيك عليه .
وكنت اجع الصور والرسائل عندي
الرسائل كنت اعمل لها سكان وارفعها لسبيس حقتي علي شان اشوفها وقت مابي بس الصور كنت تنحفظ في البوم واحطه في مكتبي بالبيت مع انه غرفتي ماحد يدخله بس كنت حريص عليها مره .

بعد هالمده اللي قضيتها معها ، ماتصورت انه ممكن اني اتعلق مع بنت تعلق بالشكل هذا ، تعلق عجيب يعني لو اني مخلص دراسه والله اني لاتزوجها ، مافيه مجال ماقدر اني اصبر عنها لو دقيقه.

انا مابي اطول بالقصه اكثر من كذا بس والله اني اختصرت منها اكثر من كذا بعشات المرات .
القصه الكامله بكل تفاصيلها - واعني كل متحمله كلمه بكل تفاصيلها من معاني - موجوده علي السبيس حقتي.

بعد الست شهور تقريبا جاني اتصال غريب منها .
قالت علي ابيك تجي ضروري للكويت الاسبوع هذا ، قلت ماقدر عندي شغل ضروري قالت لازم تجي خلص شغلك وتعال ضروري.
انا الاتصال هذا ماريحيني كنت خايف منه ، الاتصال هذا هو بدايه النهايه بقصتي مع مناااااااار
علي شان كذا من سكرت وانا قاعد افكر وش السالفه ، كنت حاط في راسي انها بتقولي شي ماهو مثل كل مره ، لانها اتصالها كان غريب مره .
علي شان كذا انا سافرت للكويت واخذت معي صديقي احمد قلت لاي شي احمد معي.

اكمل لكم بعدين !

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
[::]~ رابطة الزعيــم ( 2010/2011 ) ~[::] -- { اخبار ، استفسارات ، اشاعات ، نقاشات }	~\| Majed	[ منتدى الهلاليين ]	377	11 Jul 2011 05:04 AM
ماذا تعرف عن الكلى	الادميرال	[ صـحـتـك بالـدّنـيـا ]	3	05 Jul 2010 11:11 PM
الجنس الثالث 17 سنه ويقول تاب ولبس الحجاب	الحور	[ مـن هُـنـا و هُـناك ]	11	21 Apr 2010 02:11 AM
الجنس الثالث......... .. ملف ساخن صور... واعترافات	صوت الحب	[ طـاولـة نـقـاش ]	15	15 Sep 2006 03:30 PM
قصه علي ومنار ,,,, الجزء الثاني	Mr.Koeney	[ القصة القصيرة والرواية ]	14	28 Aug 2005 02:04 AM

آخر المواضيع
نغمة لكسب الصلاة على النبي آخر رد: الشوق للجنة <::> من 1 الى 13 آخر رد: بيـــآن ~ <::> رنة لسيدنا النبي خير الأنام آخر رد: الشوق للجنة <::> نغمة لأصحاب الذوق الرفيع آخر رد: الشوق للجنة <::> نغمة رائعة للعشاق فقط آخر رد: الشوق للجنة <::> نغمة روعة لسيدنا يوسف الصديق حملها وما راح تندم آخر رد: الشوق للجنة <::> بدل رنة جوالك برنة جديدة آخر رد: الشوق للجنة <::> نغمة أكيد راح تعجبكم كتير آخر رد: الشوق للجنة <::> سألوني الناس بالعود من اجمل ما سمعت آخر رد: كاسيولينا <::> رحبوا فيني آخر رد: بيـــآن ~

الذين يشاهدون محتوى الموضوع الآن : 1 ( الأعضاء 0 والزوار 1)